cù l’ariètta d”a matina
ca minava’ d’acqua o viantu
de ‘na porta scatrajàta
de sentia’ chillu lamiantu
.
‘Na putiga scura scura
de ‘hilijne pittàta
ccù ‘nu ciavu de scigùni
ccù ‘na chiatra a silicàta.

 ‘Na cunchètta chjìn”e acqua
 ‘da valéstra a ‘nu cantune
 pinza rùajuva e tinaglia
a ‘na rasa d”u bancone.

‘Ntr”a carvuni e caciarògne
chillu mantice jujjhiàva
 ‘u paise chi durmiadi
 quandu‘a ‘ncutine cantava’.

‘E cariòve a ciantu a ciantu
 cù stilluzze ‘a notte scura
chi nascìo d’ ’a vampa viva
chi murianu ‘n’capu ‘i mura.

 ‘A mascagna’namidlta
 ‘a cammisa divrazzàta
ccù lii cavuzi caduti
e lle scarpe a vucc’ancàta.

Mastru Ciccu era’ susùtu
primu ancore d’ ’ajurnata
già minava’ llu martiallu
 ppè ‘na vita troppu ‘ngrata.

Sempre luardu anniricàtu
cù ‘nu viacchiu carvunàru
 ‘nnamuràtu d”u mistiari
“Mastru Ciccu era’ furgiàru.”

 A ‘nu stante ‘e chilla porta
‘nu cunpagnu sempre arzillu
appricàva chilla caggia
ndù verniàva’ llu cardillu.

 A ‘na posta a ‘nu chiuvilattu
 lavurava’ senza sgarru.
De ‘nu picu ‘mbiarticàtu
 nde veniadi ‘nu sciamarru.

Cù ‘nu ciucciu chjìnu ‘e cronte
 cunzumàtu d”u lavuru.
Ma ‘ntinnàva’ llu martiallu
 chi vattia’ llu perciatùru. .

Mastru Ciccu era’ ‘nu mastru
buanu vistu e rispettatu
 Mastru Ciccu era’ ‘nu mastru
 de discipuvi turniàtu.

 Unu penza alla ‘hurnàggia
‘n’atru jetta lli carvuni
 unu mina ccù lla miazza
‘n’ atru ‘huma alli ‘mmucciùni.

 E passava’ lla jurnata
tra ‘na chiacchiara e ‘na botta
 se hermava’ Zù Jennaru
ccù ha naca d”a ricotta.

‘Na ‘hisc-ata e ‘ne vattuta
aza e vascia stà ‘ngujùtu
e dd”i ciucci cchjù caparbi
 quanti cavuci ha ricùatu.

Se spesàva dd”u martiallu
cuntentàva llu guagliune
 chi currìvu le dicia...:
“Mastru Cì.. m’ ‘u ‘ha’u sugliune?”

 ‘Hatigàva’ Mastru Ciccu
‘ntr’ ‘a ‘su grupu de licerta
ccù ‘nu core tantu grande
ccù’na manu tantu sperta.

 E passàru ‘ntantu l’anni
‘i discipuvi crisciuti
hau’ vassatu a Mastru Cìccu
 ppè llu mundu ‘su partiti.

 E cantava’ llu cardillu
e trasìa’ llu penciatùru
‘e cariòve a ciantu a ciantu
chi murianu ‘n’cap”u muru.

 Tantu tiampu speranzùsu
‘nu campare assai disiàtu
 mò c’’u tiampu è boncurusu
 d’a vacchii è cunzumatu.

‘Ne putiga scura scura
de hilìjine pittàta
 ppè ‘ne vita picinùsa
 primu e dopu sempre ‘ngrata.

‘Umartiallu ha’ piarsu ‘u ‘ntinnu
 e ha ‘ncutine ‘u cantare
e llu mantice... ‘mbecchiàtu...
 s’è stancatu ‘e manticiàre..