Nu jurnu suvu suvu jìa girandu
Ma ccù lle gambe nun sapìa ndò jìadi
a frunta vascia stavadi pensandu
ca chine un pensa è nu pavu alli ‘mpiadi…

Me scònto due signore ppè la via
Alla viduta belle cù guagliune
 È prisentate avanti a ‘hacce mia:
“Ia signu ‘a Veritate ed ia ‘a Raggiune…”

 Restài ‘ntradùttu(1) e nu ‘ngarrài(2) parova
Ppè n’attimu ‘u llu dèzadi a capire
Ma sciòta e supr’’a vucca ‘a mussarova
 Respùsi a tutt’’e due “Tantu piacire…”

‘Nu pocu cchjù luntanu era sedutu
Ccù n’uacchiu chi guardava mianzu stùartu
N’uaminu bruttu ,stroppiu e coscinùtu…
 Me dissa “Verità” “Chillu è lu tuartu…”

 “Me vena appriassu! ” Dissa la “Raggiune”
 “Ndò vaju vaju u tiagnu alla pedata
Apprètta(3) ‘nzinuàndu alle persune
Ed ia ccè signu sempre liticata…”

“ ‘Hacìmu tutti parte e na ‘hamiglia
Ma ccù su frate u ne liga amicizzia
Avimu n’atra sùaru e n’assimiglia…
Ch’è la cchjù grande e sse chiama “Giustizzia….”

 Ma “Verità” ‘ntramente me guardava
Vutàndu l’uacchi sua ntr’’a l’uacchi mia
Sentìa c’anima e core me spugliava…
 Rapìandu a vucca d’eccussì dicìa:

 “Tu pianzi d’esse n’uaminu perfettu ?
Ma ccù ognedunu e nui avìsti cchi fare
Ca chine pensa ca nu d’ha dihèttu
 Se sbagliadi un sapiandu de sbagliare…”

“Ppè l’uamini è nu ‘stìntu de natura
Chi spessu l’ha purtati a judicare
 Si un sentanu “Ragiune” è ‘na cungiura
Chi ccù lu “Tuartu” li ‘hà cundannàre”

 “Rispìattu un vè purtati unu ccù l’atru
Ca ppè arrivare ndò nun se jungìa
 A chine è tundu lu chiamati quatru
 Magari ccù l’aiutu e ‘na buscìa”

 “ allàmbicu(4) girati cù cecati
Ccù l’uacchi chiusi nun viditi luce
 E tandu sulamente i spavancàti
 Quandu allu core arriva n’atra vuce…”

 “Po’’nturguvàre l’acqua e na ‘huntana
‘nu core mavu passadi ppè buanu
C’ogne parova è na nota e campana
 Chi accòrda sulamente ppè nu suanu…”

 Si ccù n’amicu ccì avìsti cchì dire
C’’a vita è nu passare de tagliòve
‘a raggia è diventata dispiacire
C’’a stima suttamìnta le parove… “

‘Sa raggia chi te puarti u lla mantene
Ccù la cuscianza te po’ cunzigliare
 Ca te sa dire chi t’ha fattu bene
 E chine t’ajutavadi a parrare”

“ Ccù d’illa ‘hatte u disparu e llu paru
‘u stare mianzu intra e mianzu ‘hore
Capisci chin’è duce e chine amaru
 C’’a vera vuce ia’ chilla du core…”

…Quandu ‘a ragiune arrivadi a capire
 ‘u tuartu nun po’ fare atra sivìzzia
C’’a verità ‘ncuminciadi a venire...
S’ammùto tutti e parra la giustizzia…

1-stupito 2-riuscii 3-molesta 4-tentoni