‘Su core ch’è ‘mbecchiatu du campare
Cchjù stancu m’accumpagna’ ppè lla via
M’’a cinquant’anni ‘un pùa’ dimenticare
L’ affettu de ‘na cara cumpagnìa-

S’ ‘u porta’ de n’antica guagliunanza
Segretu l’ha juràtu eternu amure
Chi dorma e sse resbiglia’ cù ‘a speranza
Quandu d’’a vita stìngia’ ncù culure –

Quandu vò riturnare guagliuniallu
Ppè veste l’anima ‘e ‘nuzzènte luce
E ‘n’cap’’u mundu abbòrva’ nu purtiallu
Quandu d’’u mundu ‘u nde vò sente ‘a vuce

E nun vò dare ‘a ricchia a nullu suanu
Ch’è ‘ncrudicàtu de tanta buscìa
E puru illu ch’era’ tantu buanu
‘un và circandu amici e cumpagnìa –

Ramingu và giràndu ppè cunzigliu
Ma ‘un trova’ sìattu ndò se ripusare
Forse pecchì nessunu ‘u chiama “figliu”
Ma sulu “patre” se senta’ chiamare –

‘Si ‘higli chi t’hau sciùatu ‘e tant’affanni
Sì’ statu nove misi all’aspettare
E mò chi su passati cchjù ‘e vint’anni
Ancora ‘aspiatti primu ‘e te curcare

Vulìssidi civàtu ‘e ncù ‘a manera
ca stà mangiandu a gustu dissapìtu
d’ogne paura alluntanare ‘a spera
ca quandu riasti suvu ‘un sì’ capitu

‘Un s’affriggìa ppè nulla mavatia
Si a d’ogne vuce surdu ‘hùassi statu
Pecchì a ‘ssu mundu ‘un vidadi atra via
Pecchì stà buanu suvu chin’è ‘ngratu

Chin’ia’ chi le po’ dare ‘nu cumpùartu ?!
‘nu giustu chi le dìcia’ “ ch’è sbagliatu”
pecchì ‘a raggiune a vote tena tuartu
quandu lu tuartu ‘un vena’ raggiunatu –

Chi le dicìssi’ ca ‘ntr’’a ‘sa babele
Se po’ truvare ‘a spalla de n’amicu
No sulu amaru ma cc’è puru mele
Chi scuva’ duce de ‘nu labbru ‘e ‘hicu

E allura forse ancora piglia vuvu
Cu’ ‘na cumeta ‘mpìtta a ‘na cirèlla
Leggìaru e scatinàto d’ogne jùvu
Giràndu ‘ntùndu cù’ ‘na rondinella…

‘Su core mia ‘mbecchiatu d’’u campare
Cchjù stancu m’accumpagna ppè la via
M’’a cinquant’anni ‘un pùa’ dimenticare
Ch’è calamàru ‘e ‘nchiostru e poesia…