Mutanda vecchia ‘ntr’’a ‘nu tiraturu
‘na vota ‘mprofumàta cù ‘a regina
oje ripùasi a ‘n’angulìcchju scuru
arriciuppàta pèja ‘e ‘na mappìna

Quanti ricordi tiagnu ‘nzìami a tia
Hamu passatu giuventùte e guai
Sempre attillàta ‘n’capu ‘i carni mia
E ppè d’affettu ‘un te cangiàva’ mai

‘U mme pigliare ppè ‘nu core ‘ngratu
ca ia nun te jettàvi ppè gulìa’
ma l’urgulìcchju tua dillàsticàtu
me dava’ ‘mpàcciu e mme cadìe ppè via

‘U n t’aju ‘ntisu lamentare mai
sì stata amica…amica ‘e vera razza
(nemmenu si d’’u labbru chi tu sai
cadìa’ ‘na guccitèlla de pisciàzza)

Anima janca de cuttùne bella
Quandu la panza me ‘hacìa’ strimìni
‘ha ‘ntìsu ccù revùatu ‘e cacarella
cantu de ronze…e suanu de spissìni…

Te sevizzìai ccù lli ricciùti pivi
E tte scaliàva’ ccù lla manu mia
Quandu ‘i piducchji se ‘hacìanu vivi
Ppè mme rasc-care llà…ndù me chiùrìa

E quante vote chillu scunzuvàtu
Ventàndu lu prohùmu d’’a pudìa…
Tuttu derittu tuttu ‘ntisicàtu
Escìa’ ddè ‘hore ppè dispìattu a ttia

Mutanda vecchia ‘u d’esse curramàta
‘ntr’’a tutte l’atre ‘a meglia riasti tu
all’etichetta chi cc’era’ ‘mpacchiàta
‘nu nume cc’era’ scrittu…: MAMABU’