‘Un sacciu si ia’ suannu o veritate
Chi de ‘su mundu me strampùna’ fore
‘ntr’’a neglie e ‘ntr’’a ‘higùre ‘mpurvaràte
Cc’è ‘nu viale e ccè su’ due signore…

‘U sule caccia’ tuttu chillu pannu
Ccù l’uacchju vivu de ‘na russa spera
 Passa’ llu sc-cantu e passadi l’affannu
 E ‘ntuarnu cc’è ‘na pace ‘e primavera

 Juri urdurùsi e carruccèlle ‘e rose
Crisciuti a fila a chilli cigli ‘e via
‘ncantàtu alla bellizza ‘e tante cose…
 Ridìadi alla natura chi ridìa…

Perdutu ‘ntr’’a ‘su mundu de culure
C’’u d’avìa’ vistu…c’un sapìadi ancore
N’ajutu circu a chille due ‘higùre
N’ajutu circu a chille due signore…

Una me sconta e cù me dù’ lla manu
Le vaju apprìassu mutu…senza vuce
 Ccù l’uacchi bialli e lli capilli ‘e granu
‘na janca vesta chi le dava’ luce

E l’atra tutta ‘e nivuru ammantàta
Stava’ seduta-dilichicchja e pura
Bella alla ‘hacce…pallida e siccata
‘na rosa janca ccù ‘na vesta scura

“Janca signora chi me tiani ‘a manu
Ccù l’uacchi tua cù’ l’uacchi ‘e mamma mia
 Me guardi e m’accumpagni chianu chianu
Supr’’e savùrre de ‘sa strània via”

 “ Forse sì’ n’umbra - forse ‘nu penziaru
 Ma ia te siantu – prova a mme parrare…
‘su core mia se senta’ forestiaru…
Qual’ia’ llu nume chi te sa chiamare…?”

 “ Ia signu l’aria frisca d’’a matina
‘u sule chi te ‘nchiara lla jurnata
‘a ‘herrazzàta signu e l’acquazzina
‘u viarnu ‘a primavera de l’annata”

“ E signu ‘a terra chi te duna’ pane
E chilla chianta chi te duna’ frutti
‘i cuasc-chi e lle muntagne cchjù luntane
 E chilla manu chi ve rèja’ tutti”

“ Me sianti quandu ‘mpòrzadi lu viantu
Me sianti quandu l’acqua chiova para
 Me chiami quandu tiani ‘nu turmìantu
 Ca signu pace viantu ed acqua chiara”

“ Me vidi quandu passa’ ‘nu pezzente
 Me vidi quandu guardi mmianzu mare
E quandu ‘u ciavu guardi e ‘un vidi nente…
Ia signu ‘u “nente” chi te stà a guardare”

 Signora janca chi m’ha datu aiutu
 Ed alla luce m’ha rapiartu ‘e porte
Tu sì’ l’amica c’aju sempre avutu…
Tu sì lla vita e d’illa ia’ lla morte …

Mò sì capisciu e senza avìe paura
Ca tantu ‘su mumentu aju aspettatu…
Vuagliu parrà’ ccù tia Signora scura…
Chi sempre e sempre male ha regalatu…

-E lla signora scura me guardava’
 ‘na lacrima ‘ntr’’a l’uacchi le lucìa’…
Era lla morte chi se cumpessava…
‘a morte chi parravadi ccù mmia…:

“ Amara ia ca nun canusciu bene
Sempre raminga - sempre disgrazziata
 Nullu me vena a cumpurtàre ‘e pene
Cù tutti ‘i giusti signu secutàta”

“Amaru jùvu mia pisante e ‘ngratu
 Chi ragu ‘n’cuallu de ‘nu tiampu anticu
Vattuta cù’ ‘nu cane vastuniàtu
‘u d’aju casa e focuvàru amicu”

“ Serva d’’a vita – serva d’’u distinu
 Serva d’’u mundu c’un s’abbùrda mai
Caminu sempre ‘u solitu caminu
Ppè ‘nu ricìattu c’un se trova’ mai”

E nun c’è morte chi me po’ pigliare
Ca signu stanca d’essare maligna
 Illa è lla vuce chi te sa chiamare
 Illa è llu granu ed’ia signu ‘a gramìgna”

“T’allìsciadi ccù n’ajjhitu de viantu
Te parra duce cù te sa parrare
E quandu ‘ncigni a ride e sì cuntiantu
Te lassadi ch’è stanca de jucare”

“ Ed ia’ lla vita chi ve ‘nchiova a tutti
 A chilla cruce chi gumìja’ chiantu
Siccati cù visciglie senza frutti
Perduti alla tempesta senza mantu…”

 “…Allura viagnu ia…signora janca
‘ntr’’a mefre amare e ‘ntr’’a maligne vuce
A fare ‘a parte mia vattuta e stanca…
 E cacciu n’atru Cristu ‘e chilla cruce…”