E canta de luntanu ‘a cuccuvèlla(1)
 ‘sa cambara allumàta ‘e ‘na candiva
‘u suannu chianu chianu m’arribbèlla…
‘a vampa trema…e moradi currìva

 Cù vatri me scaliàti ‘ntr’’a ‘sa capu
Penzìari mia chi sempre vivi siti
A ‘nu rivìgliu duce l’uacchi rapu
 A mundi chi vui suvi canusciti

‘U sule ‘n’ciavu…càvuda lumèra
e ‘n’aria queta abbrazza’ llu paise
‘un sa dde viarnu e mancu ‘e primavera
‘nu tiampu chi me para’ fore mise

‘Se rughe ndù aju sempre caminatu
‘se case a ‘na curìna ammunzellàte
 me guardanu e lle guardu senza jatu
 su sempre chille e pàranu cangiate
 
Ve viju ‘ncurniciàte de culuri
‘hinestre spavancàte a ss’aria nova
 ndò su affacciàte graste(2) chjin’’e juri…
ma nullu viju ppè lle dì parova

 Arrànte vaju ccù lli passi stanchi
 Ccussì c’alla ‘ntrasàtta(3) de ‘na porta
Ccù fare liantu e lli capilli janchi…
(‘na vecchiarella de tant’anni morta)

 Penzìari mia chi sempre vivi siti
 Ccù spùartu(4) me ragàti ppè ‘sa strata
Vui suvi a ‘su paise canuscìti
‘u specchiu de ‘na vita già passata

Me spagnu e nù mme spagnu de guardare
 E viju chillu viacchiu curvu e stancu
 Scumpùsu le vulìssidi parrare…
Nannuzzu è llà…sedutu a chillu vancu

E tante ‘hacce porghjan’’u salutu
De pizzu a risu e dde ‘n’abbrazzu ‘hattu
Su genti c’’u d’avìa’ mai canusciùtu…
‘su chilli chi vasàva a ‘nu ritrattu

E ‘nu penzìaru mò me zanzànìja’(5)
De ‘nu ricùardu chi m’ha misu ‘n’cruce
E triamu quandu viju ‘a casa mia
 E sc-cantu(6) quandu siantu chilla vuce

 Cù tandu cù ‘na vota ‘u d’è cangiata
Ccù lli capilli sempre ‘nanellati
Chill’ura chi disiàvi ia arrivata…
Vicinu a mia vulissi l’atri frati

Vicini ppè sumare ‘su scavùne
Vicini ppè respunde a ‘ssu richiamu
Cc’è Mamma chi ne chiama d’’u barcune
Cc’è Mamma chi lavura allu ricamu

‘A vera cuntentizza ‘na parova
chi de tant’anni avìa dimenticatu
de tiampu de stutàu’ cù ‘na cariòva
‘a prima chi ‘sa vita m’ha ‘mparatu

 Penzìari mia ve priagu d’’u murire
Penzìari mia ve priagu d’’u fissiàre
Ca tante cose le vulìssi dire
 Ca tantu ‘horte la vurrìa abbrazzàre…

…E ll’amarizza quattru mura chiusi
‘na cambara allumata ‘e vampa viva
 ndò l’uacchji mia se rapanu scumpùsi
 ndù mora cunzumàta ‘na candiva…