Circandu e ti nde ‘hare ‘na raggiune
A vote riasti suvu a ccè penzare
Forse ca l’anni ‘a ‘hanu abbicinare
Pecchì un cè pianzi quandu sì guagliune

Forse è ‘na scusa de lu Patreternu
Quandu dicìda de ne ‘hare male
A carne viva ccù d’acìtu e sale
Ppè scrivare i ricordi a ‘nu quadernu

‘U sule nascia e moradi ogne jurnu
Na pampina ritorna a primavera
Ma n’uaminu chi piglia ‘sa carrèra
Lassa lla casa e ‘un ccè ‘hà cchjù rituarnu

E’ ‘na campana surda intra ‘na ricchia
Quandu ndè porta le persune care
Lassa lli suanni ppè tt’’i ricurdare…
‘na luce appiccicàta intra ‘na nicchia

‘Nu scuru ndò nun passanu mai l’ure
Na notte senza luna e senza stilli
Nò viantu chi te scàrma lli capilli
Nò risu nò piacire e nò duvure

No d’acqua chi revùlladi a nu jume
No mare chi s’arrìnadi ccù l’unda
E nun c’è d’acquazzina chi te ‘mpùnda
‘nu mìcciu addissiccàtu intra nu lume

Ti nde dimmàndi senza ‘u ‘hare apposta
L’inteligenza nostra è misa m’prova
Ma nullu n’ha vutatu na parova
Ma nullu n’ha vutàtu na risposta

Vaju abbussandu a ‘nu purtune chiusu
Ppè mme spesàre ‘i pisi c’aju n’cuallu
Chiamu l’amici..e ‘u d’ia affacciatu nullu…
Nemmenu mamma e patre m’hau respùsu

Ppè quantu haju capitu e sacciu ia
Suvu ncù core ‘e nivuru se vesta
Ma è d’acu e fivu n’manu a chine resta
Ppè ricamare ccù l’ipocrisia…