E piacure ammurràte(1) alla curtàglia(2)
e queta queta cada’ ‘na nivèra…
‘n’cap’’u criatùru natu senza maglia
‘n’cap’’u criatùru natu a ‘na pagliera

L’anticu campanaru accuascinàtu
D’’u tiampu e dd’’e trupìe mav’adderruttu
Ccù ‘ssu mantellu jancu e ‘mbellutàtu
‘un para’ cchjù nemmenu tantu bruttu

‘Nu suanu de zampugna alla luntana
 rivìglia llu paise e lle cuntràte
se jùngia’ a ‘nu vettagliu de campana
 chi chiama a tutti quanti ppè lle strate

‘Sa notte ch’è miràcuvu ‘e bellizza
hanu vassàtu ‘i stìanti a ‘nu spicùne
ed’ogne manu porta ‘na carizza
 ed’ogne viacchiu para’ ‘nu guagliune

‘Na luna s’è d’izàta timitùsa
e sùma’ parturìta d’’a muntagna
‘u viantu còtulìja’(3) ‘na porta chiusa
‘nu guagliunìallu sc-càntadi e sse spagna

‘Nu micciu de candiva a ‘na buffetta
‘na mamma chi remìna’ a ‘na frissura
‘u ‘hocuvàru duna’ vampa e sc-chètta
e fuma’ ‘na cistella de cullùra

Chiangia nu gattu n’capu ’i ceramìli
friddùsu vrùndu vrùndu d’’i gucciàli
‘a ‘huma d’’i ‘hucùni sum’’a fili
‘i miarguli(4) gumìjo’ (5) dd’’i canali

Ma ia’ ‘nu friddu c’’allu core ‘un tocca
E tutti s’ammasùnanu alla chiazza
Ndù ‘a ‘hocara ricoglia’ ccù ‘na jocca(6)
ad’ogne mamma ccù ‘nu ‘higliu ‘mbrazza

‘U viantu ‘m’porza e ‘nu ‘mbriacu canta
 ‘a vrascia copanìja’(7) llu muzzùne(8)
e lle cariòve de ‘sa notte Santa
scahùjanu(9) ‘ntr’’i vichi d’’u riune

Stanotte nun c’è postu ppè lli stìanti
S’arròtanu alla voca d’’u strinaru
E tutti vùanu ride e ssù cuntìanti
Ppè dare mele a ‘nu ‘nducùne(10) amaru

Zù Peppe capizzìja’ (11) a ‘nu vanchìattu
Stà mutu mutu ‘ncicugnàtu(12) ‘e vinu
 Abbòrva’ l’uacchi e sbèrsa(13) llu cuzzìattu
Jancu e cardàtu cù ‘na manna ‘e linu

Mò s’arricètta’ pur’’u zampugnàru
‘na vecchia stizzunìja’ alli carvùni
a ‘nu scavùne dorma ‘nu quatràru
 ‘na porta chiangia… e serra’ lli dubrùni

‘A vrascia russa è diventata janca
demane sìmu rota ‘e ‘nu distinu
ed’ogne Cristu ccù lla ‘haccia stanca
 và posadi ‘i turmìanti a ‘nu cuscinu

Natale…’hesta ‘e pace e d’allegrìa
Natale…ma ‘u penzìaru ndù me porta…?
Rapa’ ‘nu surcu ntr’’a lu core mia…
Ppè Mamma cara…de tant’anni morta

 (1)radunate (2)recinto di ovini (3)muovere (4)stalattiti di ghiaccio (5)gocciolano (6)chioccia (7)scava (8)grosso ceppo-radice d’albero (9)scantonano (10)boccone (11)dormicchia (12)ebbro-alticcio (13)reclino